Bü gün dünyanın hər yerində olduğu kimi vətənimiz Gürcüstanın da müxtəlif bölgələrində, həmçinin Marneulidə də İmam Hüseyn (ə)-in Ərbəini münasibəti ilə əzadarlıq məclisləri keçirilmiş və ehsan süfrələri açılmışdır.
Gürcüstan Əhli-Beyt (ə) Cəmiyyəti və həmin Cəmiyyətin nəzdində fəaliyyət göstərən Əhli-Beyt (ə) Aşiqləri Forumu və "Zeynəb (s.ə)" Qadınlar Birliyinin təşəbbüsü ilə Marneuli şəhərinin yaxınlığındaki Yağılca təpəliklərində yerləşən Hz Muhəmməd (s.ə.a.s)-in, İmam Əli (ə)-ın və İmam Həsən (ə)-ın vəfadar və əməli-saleh səhabəsi Hz Qeys ibn Səd Ubadənin qəbri başında əza məclisi keçirilib.
Quran tilavətindən sonra çıxış edən Əhli-Beyt Cəmiyyətinin sədri, imam-cümə ilahiyyatçı Hacı Rasim Məmmədov sözlərinə dünya müsəlmanlarının rəhbəri Ayətullah Seyyid Əli Xameneinin Ərbəin yürüşü haqqında sözləri ilə başlayaraq deyib: "Rəhbər Kərbəla yürüşünə gözəl ad qoyub- "İman və eşqin, əql və duyğunun sintezi". Çox mükəmməl ad seçilib, bu dörd xüsusiyyət bütün ali dəyərlərin məcmuəsidir. İslam bu dörd xüsusiyyət əsasında köklənib."
İlahiyyatçı, bu mövzularda çox dəyərli söhbətlər olunduğunu, ona görədə bu ziyarətgah haqqında danışmaq istədiyini bildirərək, Hz Qeys ibn Səd haqqına danışıb.
Hacı Rasim, ilk öncə Hz Qeysin həyatından, onun əsil-nəsəbli biri olduğunu, Rəsuli-Əkrəm (s)-la bütün döyüşlərdə iştirak etməsindən, bir gün atası ilə birgə Peyğəmbərimizin (s) itmiş dəvəsini tapmasından, Peyğəmbər (s)-ın onu "pak övlad" adlandırmasından danışıb.
Davamında Hacı Rasim, Hz Qeys ibn Sədin əzəmətli zahiri görünüşü və geniş maddi imkanlarından danışıb.
Hacı Böyük Səhabənin şəxsiyyətindən danışaraq, onun mühəddis və alim olmasını, Peyğəmbər (s) zamanında siyasət, zəka və uzaqgörənlikdə 5-dən biri və çox etibarlı biri olmasını vurğulayıb.
Bundan sonra Hacı Rasim Hz Qeysin İmam Əli (ə) üçün kim olasından danışaraq. onun Qədir-Xumdan iştirak edən və vəfalı qalan 12 nəfərdən biri olmasını söyləyib.
Müaviyə (lən)-nində həmişə onu ələ almağa çalışdığını amma bu mübarək insanın əsla İmam Əli (ə) və İmam Həsən (ə)-dan üz döndərmədiyini bildirib.
Sözlərinin sonunda Hacı Rasim Hz Qeys ibn Sədin Tiflisə gəlişindən və qəbrinin xalq arasında məşhur olmasından danışıb.
Hacı Rasimin çıxışından sonra Əhli-Beyt məddahı Rza Cəfəri və İmam Əli (ə) məscidinin axundu Hacı Hacı Hacıyev mərsiyələr oxuyub və əzadarlıq olunub.
Son olaraqsa "Fərəc" duası oxunub.

































Ahlibeyt.ge