Qədr gecəsinin qədrini bilək

Mьəllif: admin1

Tarix: 31-03-2024, 10:34

Ramazan ayında elə bir gecə vardır ki, min gecədən daha fəzilətlidir. Bu gecədə mələklər yerə enər və insanların bir illik taleyi təsdiq edilər. Bu gecə - Quranın nazil olduğu gecədir.

Hədislərimiz buyurur ki, bu gecənin qədrini bilin və bu gecəni səhərə qədər oyaq qalın. Gecəni ibadətlə məşğul olaraq, axirət azuqənizi çoxaldın.

Allah Təala bu mübarək ayda bəndələrini Öz kərəm süfrəsində əyləşdirər və onlara öz bəxşişlərini əta edər. Kim öz Mövlasının süfrəsində əyləşər və ac qalar ki?

Gecə oyaq qalmaq – ibadət edənlərin aquzəsi, oyaq qalanların tökdükləri göz yaşları bəsirətlərini açan amil olaraq, onların duasını səmaya qaldırar və birbaşa Allaha çatdırar. Bu, elə gecədir ki, səhər dan yeri sökülənə qədər salam və nurla dolu olar.

Qədr gecəsi – qəlb süfrəsinin açıldığı, Qəffar olan Allaha tərəf əllərin qaldırıldığı, insanın ruhunun dirçəldiyi bir gecədir. Bu, elə gecədir ki, ancaq oyaq qalaraq onun bərəkətini əldə etmək olar. Bu, elə gecədir ki, insan gərək öz varlığını dərk etsin və özünü Xaliqə yaxınlaşdırsın.

Allah Təala bu gözəl gecəsini başqa gecələr arasında gizlətmişdir. Necə ki, başqa şeyləri də gizlətmişdir.

Allah Öz razılığını ibadətində gizlətmişdir ki, bəndələr bütün ibadətlərə üz çevirsinlər. Qəzəbini günahlarda gizlətmişdir ki, onların hamısından çəkinsinlər.

Dostunu insanların arasında gizlətmişdir ki, hamıya ehtiram qoysunlar. Duanın yerinə yetməsini gizlətmişdir ki, bütün duaları oxusunlar.

Ölüm vaxtını zamanların arasında gizlətmişdir ki, hər an ölümə hazır olsun və ondan qorxsun. Qədr gecəsini də gizlətmişdir ki, Ramazan ayının bütün gecələrini böyük hesab etsin.

İmam Səccad (ə) Ramazan ayı ilə vidalaşan zaman buyurur: “Allahım, bizə çoxlu nemətlər verdin”. Ən üstün nemətlərindən biri – Ramazan ayıdır. Ən üstün fəzilətlərdən biri – bu ayın orucudur ki, bizə nəsib etmişdir.

İmam Sadiqdən (ə) soruşurlar ki, Qədr gecəsi necə min aydan daha üstündür? Həzrət (ə) buyurur: “O gecədə edilən yaxşı əməl Qədr gecəsi olmayan min ayda edilən əməldən daha üstündür”.

Həzrət Peyğəmbər (s) buyurur: “O kəs ki, Qədr gecəsini oyaq qalar – gələn ilin Qədr gecəsinə qədər cəhənnəm əzabı ondan uzaq olar”.

İmam Musa Kazım (ə) buyurur: “O kəs ki, Qədr gecəsində qüsl alar və dan sökülənə qədər oyaq qalar – günahları bağışlanar”.

Allah biz müsəlmanlara bu tövfiqi vermişdir ki, Ramazan ayının əhli olaq. Halbuki, bir çoxları bu ayın fəzilətlərindən məhrumdurlar.

Allahım! Bu mübarək ayda Sənə layiq ibadət etmək tofiqini bizlərə əta et və bizlərə öz süfrənin başında həqiqi mərifət və tanımanı nəsib et!

Taleyimizin həll olduğu Qədr gecəsinin qədrini həqiqi mənada bilməyi bizlərə inayət et!

/Deyerler.org/

« Aprel 2024 »

Ça