Dəccal sözünün mənası

Mьəllif: admin1

Tarix: 2-01-2022, 20:30

Axırəz-zamanın əlamətlərindən biri də Dəccalın zühur etməsidir.

Dəccalın zühuru təkcə İslam dinində deyil, yəhudilik və xristianlıqda da müzakirə obyektinə çevrilmiş mövzulardandır. Ona görə də əvvəlcə "dəccal" sözünün mənasını araşdıraq.

Yəhudilikdə

Yəhudi dini təlimlərində "dəccal" sözü iki sözün birləşməsindən əmələ gələn mürəkkəb bir söz olub, mənası "Allahın düşməni" deməkdir. Yəni “dəccal” sözü anti, zidd və düşmən mənasını verən “dəcc”, tanrı, Allah mənasını verən “al” sözlərinin birləşməsindən əmələ gəlib.

Xristianlıqda

Xristianlığa əsasən, "dəccal" sözü (antichrist) "Məsih əleyhdarı" mənasındadır. Xristianlara görə axirəz-zamanda İsa (ə) ilə düşmənçilik edəcək şəxs Dəccaldır. Bəziləri isə ümumilikdə Məsihin (ə) təlimləri ilə düşmənçilik edənləri Dəccal hesab edirlər.
İslamda

"Dəccal" sözünün ərəb dilindəki kökü "dəcələ" felindən olub, "çox yalan danışan və hiyləgər" mənasındadır. Həmçinin (məsdər forması "tədcil" olan) "dəccal" sözü "qızılla örtmək" və "qızıl geyinmək" mənalarını da verir.

Bildiyimiz kimi, zərgərlər adi dəmir metalları qızıl suyuna çəkməklə onların üzərini örtərək onlara yalançı cilvə və bəzək verir. Həmçinin çox yalan danışan insan batili haqq göstərmək üçün çirkinliklərə aldadıcı və zahiri gözəllik donu geyindirir.

Dəccal –zahiri aldadıcı cilvəyə malik olsa da, batində Allah düşməni olan bir şəxs olacaqdır. O, bütün növ yalan, hiylə, sehr, cadu və s. çirkin vasitələrdən istifadə edərək batil işlərə haqq donu geyindirəcəkdir. O, çirkinliyi gözəllik, pisliyi yaxşılıq, Cəhənnəmi Cənnət kimi cilvələndirəcək.

Onun fitnə-fəsadı Qərbdən Şərqə kimi yayılacaq. Onun fitnələrinin əsasını musiqi və qadın cazibəsi təşkil edəcəkdir. Peyğəmbər (s) hədislərində Dəccalın fitnələri "əşəddül-fitən", yəni ən böyük fitnələr kimi tanınır. Peyğəmbər (s) öz ümmətinə Dəccalı və onun xüsusiyyətlərini yaxşı tanıyıb hədəflərini diqqətlə öyrənməyi tövsiyə etmişdir.

Bundan başqa Peyğəmbər (s) Dəccalın nə qədər təhlükəli olduğunu bir-birilərinə və gələcək nəsillərə xatırladıb onun istəklərinin əksinə hərəkət etmək göstərişini vermişdir.

Əziz Peyğəmbərimiz (s) Dəccal haqqında belə buyurur: “Dəccalın xüsusiyyətlərini sizə söylədim ki, bu barədə düşünüb həqiqəti tapasınız. Onun istəklərinin əleyhinə əməl edin, gələcək nəslinizi Dəccalın fitnəsindən xəbərdar edin və onu bir-birinizə (həmişə) xatırladın. Həqiqətən, Dəccalın fitnəsi ən şiddətli fitnə və ən ağır imtahandır” (“Kənz əl-ümmal”, c.14, səh. 601).

« Aprel 2024 »

Ça