Mübarək Ramazan ayında bir çoxlarımız Quran oxuyur, ibadət edir və gecələri oyaq qalırıq. Bəzən şeytanın (lən) vəsvəsələrinə uyub, bu işimizi böyük hesab edir və onunla qürurlanırıq. Elə hesab edirik ki, başqa insanlarla müqayisədə Allaha daha yaxınıq və Onun üçün daha çox işlər görürük. Bu, lənətlik şeytanın həmin nüfuzudur ki, qəlb diyarımızı viran edir və əməllərimizi puça çıxardır.

Ona görə də İmam Sadiq (ə) özünə vurğun olanlar haqqında buyurur: "Dindarlığın bəlası – həsəd, xudbinlik və lovğalanmaqdır”.

Mübarək ayla bağlı İmam Əli (ə) buyurur: "Allah orucu vacib etmişdir ki, onun vasitəsilə yaranmışların ixlasını imtahana çəksin”

İmam Sadiq (ə) buyurur ki, şeytan (lən) deyir: "O zaman ki, bəni-Adəmə üç şeydə hakim olaram, hər (yaxşı) əməl yerinə yetirsə də, mühüm olmaz. Çünki ondan qəbul olmaz. (O üç şey ibarətdir:) O zaman ki, (yaxşı) əməlini çox hesab edər, günahlarını unudar, (qəlbində) təkəbbür  hasil olar”.